Gianod sa baha patay

CEBU, Philippines - Usa ka 66-anyos nga dalagang ulay ang naanod sa baha atol sa pagbunok sa kusog nga uwan kagahapon diha sa sitio Upper Laguerta sa barangay Lahug ning dakbayan.

Patay nang napalgan ug gihaw-as sa tubig si Remedios Rosal, molupyo sa maong dapit, sa gibana-banang 300 metros paubos gikan sa dapit diin kini uwahing nakit-ang buhi.

Matud pang PO2 Judan Batucan sa Homicide Section sa pakighinabi sa Banat News nga si Rosal nanglaba sa maong sapa ug wala makabantay sa kalit nga pagdagayday sa kusog nga bul-og sa baha gikan sa bukid.

Kini nabanlas paubos ug nalumos apan naagian sa usa ka Jojo Capanida nga wala nay kinabuhi maong gihaw-as kini. - Edwin Ian Melecio ug Monnahlie (BANAT NEWS)