CEBU, Philippines - Usa ka gipasanginlang level three nga drug pusher ang nasikop sa City Intelligence Branch (CIB) sa Cebu City Police Office niadtong Miyerkules sa gabii diha sa Sto. Niño Street, barangay Hipodromo ning dakbayan nga miresulta sa pagkasakmit sa mga ilegal nga drugas nga nagkantidad og P100, 000.
Ang suspetsado giila nga si April Marie Badon, 22, kinsa nakuhaan og 45 ka gagmay ug usa ka dako nga pakete nga pulos may sulod nga gidudahang shabu, kuwarta nga mibalor og P69,000 ug usa ka KG9 submachine pistol nga magazine.
Ang suspetsado gironda tungod sa search warrant nga gi-isyu ni Judge Sylvestre Maano Jr. sa Branch 17 sa Regional Trial Court (RTC) niadtong Disyembre 3.
Ang pagkasikop sa suspetsado maoy usa ka hiniusang operasyon tali sa CIB nga gipangulohan ni Chief Inspector Romeo Santander uban sa Intelligence and Detective Management Branch (IDMB) ni Chief Inspector George Ylanan.
Si Badon giingong gipaubos sa surveillance sulod sa duha ka semana una gihimo ang operasyon. Matud pa ni Santander nga si Badon wala mosukol human pakitai sa search warrant samtang giposasan.
Sumala pang Santander base sa ilang nadawat nga report si Badon makabaligya og 100 hangtod sa 200 ka gramong shabu matag semana.
Dugang impormasyong nadawat sa kapolisan nga kini maoy tigdawat sa mga halin sa ilegal nga drogas sa iyahang igsuon nga si Kerwin Espinosa nga naa sa Cebu City Jail karon human maaresto kapin usa ka tuig na ang milabay.
Si Badon dihang kuhaan unta sa iyang habig kabahin sa mga pasangil sa kapolisan batok kaniya nagdumili kini sa paghatag og komento ug gisalig niini ang tanan sa iyahang abogado. - Ria Mae Booc sa The Freeman ug Monnahlie Olandria (BANAT NEWS)