Whistleblower 'mitalaw' sa hagit sa Kapitolyo

CEBU, Philippines - Mitalaw ang whistleblower nga si Crisologo Saavedra pagtubag sa hagit nga himuong publiko ang iyang pasangil nga si Gob. Gwendolyn Garcia nangawkaw og kapin sa P50 milyones nga salapi hinungdan sa iyang gipasaka nga kasong plunder batok sa gobernador.

Apan ang tigpamaba sa gobernador, manlalaban Rory Jon Sepulveda determinado na nga mosang-at og kasong malicious prosecution batok kang Saavedra karong adlawa sa korte.

Si Sepulveda mihagit kang Saavedra nga “magpakalalaki” sa iyang pamasangil ug pag-atubang sa kaso.

Matud pa ni Saavedra nga igo lang niya gihubit ang balaud sa plunder ug wala usab siya magtumbok sa gobernador.

Giklaro ni Saavedra nga ang Ombudsman ang may gahom sa pag-imbestigar ug ang iyang gisang-at nga reklamo naghangyo sa maong buhatan sa pag-imbestigar kang Garcia.

Gibasehan ni Saavedra sa iyang hangyo-reklamo ang kaso sa giingong anomalosong pagpalit sa Kapitolyo og luna sa mga Balili sa lungsod sa Naga.

Si Sepulveda sa iyang bahin nagkanayun nga tataw kaayo sa pinanumpaang pamahayag ni Saavedra nga nagtumbok sa gobernador ug ubang akusado sa kaso nga iyang gipasanginlang nangawkaw og salapi nga nakapaburot sa ilang katigayunan.

Andam hinuon atubangon ni Saavedra ang kasong ipasaka batok kaniya sa gobernador.  – BANAT NEWS