Midahiling lugar sa Naga dili na papuy-an kuralon, bantayan

CEBU, Philippines - Ang Department of Environment and Natural Resources-Mines and Geosciences Bureaus-7 (MGB) mirekomendar sa pagbutang og barbed-wire nga koral sa labing daling panahon sa apektadong lugar diin mahitabo ang pagdahili sa yuta sa sitio Buli, Barangay Mayana sa dakbayan sa Naga.

Gawas niini ang MGB mirekomendar usab nga pabutangan og mga tanod nga mobantay sa perimeter fence aron walay mosulod sa lugar nga apektado ug pabutangan usab og mga karatola nga delikado ang maong dapit.

Ang mga namuyo diha sa lugar nga apektado gimanduan usab sa pagpabakwit ngadto sa luwas nga lugar.

Ang maong rekomendasyon sa MGB napadangat na ngadto kang Mayor Valdemar Chiong ug sa kapitan sa nahisgutang barangay nga si Antonio Alferez niadtong Miyerkules.

Niadtong Miyerkules si MGB-7 Regional Director Loreto Alburo mipadala kang Senior Science Research Specialist (geologist) Abraham Lucero ngadto sa lugar aron mopahigayon og field investigation.

Sa imbestigasyon nasuta nga ang yuta sa lugar sagol anapog ug lapokon ug mihumok kini sa sunod-sunod nga bunok sa uwan hinungdan sa pagdahili.

Base sa imbestigasyon ni Lucero, 12 ka mga balay ug pito ka mga poste sa Visayan Electric Company (VECO) ang natabunan sa yuta.

Niadtong tuig 1984 dunay nahitabong pagdahili sa yuta sa nahisgutang barangay diha dapit sa Mayana Elementary School apan walay gikatahong danyos ang maong insidente.

Si Mayor Chiong nga nahinabi sa Banat News kagahapon mibutyag nga padayon pa gihapong nag-irog ang yuta diha sa sitio Buli ug mimando na siya sa opisyal sa barangay nga bantayan ang lugar ug badlongon ang mga bata nga magtabok-tabok aron malikayan ang disgrasya.

Ang mga namakwit naa ibutang sa barangay hall sa Mayana ug uban kanila temporaryong misaka una kini sa ilang mga paryente. Ang kagamhanan sa siyudad nagplanong mohatag og pinansiyal nga hinabang ngadto sa mga apektadong pamilya aron magamit unya nila og patakod og balik og balay. – BANAT NEWS