Upat tipi, 24 angol

BACOLOD CITY, Philippines — Upat ka mga tawo ang nakalas samtang 24 ang naangol human mosampak sa usa ka punoan sa kahoy ang mini-bus nga ilang gisakyan kagahapon sa buntag diha sa national highway sa Talisay City, Negros Occidental.

Si Talisay Police traffic investigator PO3 Loreto Santillan miila sa mga nakalas mao sila si John Gallenero, 44, taga Talisay City; Leopoldo Parcon taga Cadiz City, Myrna Octavio, 48, ug iyang inahang si Rogelia Antiporda, 74, pulos taga Silay City.

Ang mga biktima luwan sa pasaheroang mini-bus nga gimaneho ni Roel Figueroa, 25, taga barangay Damgo sa E.B. Magalona gikan sa Escalante City padulong sa Bacolod dihang nahitabo ang aksidente.

Ang 24 ka mga nangaangol,duha kanila ang naa sa talandugong kahimtang pulos gidala sa Riverside Medical Center, Doctors’ Hospital ug Corazon Locsin Montelibano Memorial Regional Hospital sa Bacolod City matud pa ni Santillan.

Padayon pa ang gihimong imbestigasyon sa kapolisan kabahin sa aksidente nga gikalambigitan sa maong bus nga gipanag-iya sa usa ka Teodoro Parcon sa E. B. Magalona nga gituohang nawad-an og brake ug nasampak sa punoan sa kahoy.

Ang maong lugar aduna nay natalang unom ka aksidente, ang maong lugar giingong taw-an tungod sa mga ‘dili-ingon nato’ nga mga namuyo. - BANAT NEWS