Pagbasura sa Truth Com. 'bayad sa utang'

CEBU, Philippines - “Bayad sa utang”, mao kini paghulagway ni Cebu Regional Trial Court Executive Judge Meindrado Paredes sa mga mehistrado sa Korte Suprema nga mibasura sa executive order ni Presidente Benigno “Noynoy” Aquino nga nagduso sa katukoran sa Truth Commission aron tahasan pag-imbistigar sa mga anomalusong transaksiyon sa milabay’ng administrasyon ni kanhi Presidente Gloria Arroyo.

Atol sa interview sa usa ka estasyonan sa Radyo way lipod lipod nga gibutyag ni Judge Paredes nga nasagmuyo gyud siya sa gipakanaug nga desisyon sa Korte Suprema pinangulohan ni Chief Justice Renato Corona sa pagbasura sa maong komisyon.

Diskontento si Judge Paredes sa maong desisyon tungod kay alang kaniya kinahanglang maimbistigar gyud sa komisyon ang mga kuwestiyonableng transaksyon kaniadto sa administrasyon ni Arroyo sama sa   ZTE- NBN deal nga nagpabiling tanghaga hangtod karon ug uban pa.

Tungod sa maong desisyon gihulagway ni Judge Paredes nga sama ra nga gitabunan sa mga mahistrado ang mga kahiwian sa milabay’ng administrasyon.

Nagtuo si Judge Paredes nga “bayad sa utang” sa maong mga mahistrado kang Arroyo ang ilang desisyon sanglit si Arroyo maoy nagtudlo kanila sa maong katungdanan.

Dugang ni Judge Paredes nga bisan og sakop siya sa judiciary apan wala siya mahadlok nga silotan ning iyang pamahayag gumikan kay igo lang siyang nagpadayag sa iyang huna -huna kalabot sa maong isyu nga naglambigit og public interest.

Miingon si Judge Paredes nga aduna pay remedyo ang Malacanang pinaagi sa pagduso og motion for reconsideration sa pamasin nga katun-an og balik sa mga mahistrado ug usbon ang ilang desisyon.  - BANAT NEWS