Balor P3M nga pabuto gisakmit sa mall

CEBU, Philippines - Moabot sa gibanabanang P3 milyones nga kantidad sa mga nagkadaiyang klase sa mga pyrotechnics kon pabuto ang gisakmit sa mga sakop sa City Treasurers Office sa kagamhanan sa dakbayan sa Sugbu inabagan sa kapulisan sa Criminal Investigation Branch (IDMB) sa Cebu City Police Office (CCPO) atol sa gipahigayong ronda sa miaging gabii diha sa sulod sa usa ka dakong department store nga nahimutang sa North Reclamation Area sa barangay Mabolo.

Si Sr. Supt. Melvin Ramon Buenafe, hepe sa CCPO nga nahinabi sa mga tigbalita kagahapon miila sa tag-iya sa mga pyrotechnics nga mao si Bryan Lim nga giingong higala sa usa ka dakong opisyal sa dakbayan.

Matud ni Buenafe nga ilang gironda ang mga gipamaligyang pyrotechnics base sa nalatid sa resolusyon no.1394 nga giaprobahan sa konseho niadtong Disyembre 2008 nga nag-regulate sa namaligya ug paggamit og mga pabuto diin adto lang kini himuon sa designated area ug mao ang South Road Property (SRP).

Si Chief Insp. Romeo Santander, hepe sa IDMB nga maoy nangulo sa mga pulis nga mikuyog kang Ofelia Oliva ,head sa City Treasurers Office nagkanayon nga nakadawat og reklamo ang city hall bahin sa gipamaligyang pyrotechnics sa maong mall.

Matud ni Santander nga gi-verify sa taga city hall ug nasuta nga ang permit niining giaplayan mao ang barangay Guadalupe diin adto sila mo-display sa mga pyrotechnics.

“Naay lugar nga baligyaanan nga mao ang SRP…other than that wala na,” matud pang Santander, ang maong mga pabuto diha gibaligya sa ground floor ug 3rd floor.

Matud niya nga sinugdanan palang kini sa ilang kampanya sa mga pabuto nga gipang-display sa mga lugar nga wala gitugot ug karon sunod nga mga adlaw duna pa silay laing operasyon nga himuon.

Sa laing bahin, ang Cebu City Market Administrator nga si Racquel Arce nagkanayon nga makapamaligya lamang og pabuto sa SRP ug pagkakaron aduna nay 50 ka vendors nga miaplay og permiso apan gipailawom una sila og safety seminars.

Ang buot makabaligya og pabuto may bayad nga permit sa City Hall nga nagkantidad og P1,800, kinahanglang tag-pito ka metros ang distansya sa matag vendor.  - Rey B. Pasaporte ug Sanden Anadia (BANAT NEWS)