Nagdudang dili anak ang iyang gitagod

CEBU, Philippines - Giangkon sa amahan nga nakapatay sa iyang kaugalingon anak nga kapin pa sa usa ka tuig nga iyahang nabuhat ang pagtigbas patay sa biktima gumikan sa mga tabi-tabi nga iyahang nadunggan nga dili siya maoy amahan sa bata.

Niadtong Domingo sa hapon si Alfredo Taglucop Jr. ,29, taga Poster Village barangay Maravilla, Tabuelan miunay pagtigbas sa liog sa iyang anak nga si James Amper kapin pa sa usa ka tuig ang pangidaron sa ilang pinuy-anan gamit ang 9-pulgadas nga sundang human siya ug ang iyang mga higala nag-inom niadtong higayona.

Matud ni Taglucop sa mga sakop sa media dihang nahinabi kini kagahapon diha sa buhatan ni Sr. Supt. Erson Digal, pangulo sa kapulisan sa lalawigan nga dili na siya makahinumdum kun makapila niya tigbasa ang iyahang anak.

“Diha nako kahibawo nga patay na kay nituasik naman ang dugo sa akong nawong,” matud pa niya.

Si Alfredo miangkong miikyas siya dayon human sa hitabo ug miadto siya sa balay sa iyang uyoan nga nahimutang sa bukirang bahin sa barangay Kantubaon apan niadtong Lunes sa buntag boluntaryo siyang mitahan sa barangay kapitan ug gi-turn over ngadto kang Insp. Almirante Bacayo, hepe sa Tabuelan Police Station nga nagpahigayon usab og hot pursuit operation niadtong higayona.

Si Maribelle, kapuyo ni Alfredo mitug-an nga gidudahan siyang dunay relasyon sa ilang silingan nga ginganlan og Robert Sumalinog.

“Hapit nako mapatay si Robert kay ila mang ipasangil nga maoy amahan sa among anak nga unta liwat man kaayo niya (Alfredo) ang bata,” matud pang Maribelle.

Si Alfredo mitug-an usab nga bag-o siyang miyembro sa kulto nga gitawag og “Sagrado Corazon de Jesus” kun mas nailang “Tadtad” kansang iyang amahan nga si Alfredo Taglucop Sr. maoy chapter leader.

Ang mga miyembro sa kulto miingon nga duna silay “anting-anting” nga kung pusilon o tigbason dili sila madutlan.

Matud ni Insp. Bacayo nga mga miyembro sa dakbayan sa Talisay miadto sa Tabuelan ug nang recruit aron mosulod sa ilang pundok.

Niingon si Bacayo nga ang miyembro sa kulto miadto sa iyang buhatan niadtong Lunes ug gikundenar ang ilahang kauban.

Kasong parricide ang gisang-at sa kapulisan kagahapon batok kang Alfredo diha sa provincial prosecutors office.  – BANAT NEWS