Gidakdaka'g bato tipi

CEBU, Philippines - Gidakdakan og bato patay ang usa ka hubog nga lalaki nga gipasanginlang nanggukod ug buot untang manunggab sa gikalalis atol sa ilang panag-inom sa barangay Baliang sa siyudad sa Danao niadtong Domingo sa alas 4:30 sa sayong kaadlawon.

Ang biktima mao si Reneboy Dawe, 39, molupyo sa maong lugar samtang ang suspek mao si Richard Capungan, 34.

Matud ni SPO4 Jose Salingua Jr., sa Danao City Police dihang nahinabi sa Banat News ang biktima ug ang suspek nag-inom sa gipahigayong disko sa maong lugar.

Dihang nangahubog nagkalalis kini ug nagkaaway dayun gigukod sa biktima ang suspek nga nagbitbit og kutsilyo.

Sa kahadlok sa suspek midagan kini apan wala lung-i paggukod sa biktima ug dihang hapit na siya maapsi nakahunahuna kini pagpunit og bato dayun gihapak ug naigo sa ulo ang biktima.

Dihang nahagba gitiwasan sa suspek pinaagi sa pagdakdak og bato ang ulo ni Dawe nga maayong pagkagusbat hinungdan sa hinanali niining kamatayon.

Hinuon ang suspek human sa hitabo mitahan dayun sa iyang kaugalingon sa kapitan sa barangay nga si Ronilo Tejero ug mao nay mitugyan kaniya ngadto sa kapulisan.  – BANAT NEWS