Basurero gitusak og bala

CEBU, Philippines - Patay diha dayon ang usa ka basurero human gipusil sa iyang kaatraso samtang nagguyod ang biktima sa traysikad nga gikargaha’g mga puthaw sa miaging gabii diha sa dalan David Sy Gaisano St,. sa barangay Tejero dakbayan sa Sugbu.

Ang biktima mao si Niño Yunting ,31, taga sitio Silangan 2, Tejero ug ang gitumbok nga suspek nailhan nga si Marky Ybañez, taga Blessed Sacrament Villagonzalo 2, Tejero ug laing duha ka mga kauban niini nga wala pa mailhi sa kapulisan.

Sa imbestigasyon ni SPO4 Alex Dacua ug mga kaubanan sa Homicide Section diha sa crime scene nakaangkon og samad pinusilan ang biktima diha sa nawong ug buko-buko nga maoy nakaingon sa hinanali niining kamatayon.

Giingong nagtulod ang biktima sa iyang traysikad nga puno sa mga junk materials diha sa nahisgutang lugar sa dihang kalit miabot ang mga suspek uban sa duha niini nga wala pa mailhi nga kauban ug mipusil sa biktima makadaghang higayon. – BANAT NEWS