Negosyante gipatay

CEBU, Philippines - Usa ka manindahay og prutas ang gipusil-patay sa usa sa duha ka armadong tawo samtang naglingkod sa iyang tindahan kagahapon sa alas-5 sa kabuntagon diha sa Salinas Drive Extension sa barangay Lahug dakbayan sa Sugbu.

Ang biktima mao si Jonathan Lamano, 22, kinsa nakaangkon duha ka samad pinusilan sa tuong nawong ug dughan ug milapos ang bala sa iyang tangkugo nga maoy nakaingon sa hinanali niining kamatayon.

Sigun sa nakasaksi nga duha ka tawo nga nagsakay og motorsiklo uban sa backrider nga nagtaptap sa nawong ug ang drayber nagsul-ob og full-face helmet maoy responsable sa krimen.

Giingong naglingkod sa bangko sa tindahan ang biktima dihang giagian sa duha ka kriminal apan mibalik kini ug ang backrider nanaog dayong dul-it pagpusil sa biktima.

Ang mga sakop sa Crime Scene Investigation Unit (CSIU) nakarekober og tulo ka kapsula ug usa ka slug sa .45 nga kalibre sa armas.

Si PO2 Judan Batucan, imbestigador sa Homicide Section miingon nga daghang nakakita atol sa krimen apan pakyas sila pag-ila sa dagway sa mga mamumuno.

Si Mabitha, inahan sa biktima mitug-an sa kapolisan nagdudang may kalambigitan ang pagpatay sa nahitabong pagpanunggab sa miaging tuig diin ang biktima maoy nakadunggab apan wala masang-at ang kaso sa korte human dili interesadong mopasaka ang hingtungdan batok sa iyang anak.

Tungod niini nagduda ang inahan nga posibleng kadtong nadunggaban sa iyang anak, mikuha og tawo aron ipapatay ang iyang anak o ba kaha maoy nangunay sa pagpatay.  – BANAT NEWS