Maguwang mitipi sa manghod

CEBU, Philippines - Gipatay sa maguwang ang iyang kaugalingong igsuon pinaagi sa pagdunggab human sa ilang sinukmagay sa miaging hapon diha sa Quijano Compound sa barangay Calamba dakbayan sa Sugbu.

Ang namatay mao si Edgar Pelaez ,38, samtang ang suspetsado mao ra sab iyang maguwang nga si Carlos ,43, kinsa boluntaryong mitahan sa miresponding kapulisan.

Si PO3 Geoffrey Gutual sa Homicide section sa Cebu City Police Office (CCPO) nga nahinabi sa Banat News mitug-an nga sa wala pa nahitabo ang pagpanunggab ang mga anak sa duha giingong nangawat og puthaw uban sa laing menor de edad.

Matud ni Gutual nga giuli sa biktima ang kinawat nga puthaw ngadto sa tag-iya niini ug gikulata ang menor de edad nga maoy migalgal sa ilang mga anak.

Apan giingong mibabag ang kapuyo sa suspek nga si Salome Legaspi ug maoy nasukmagan sa biktima, ang suspek pagkakita niini nasuko ug nahitabo ang sinukmagay sa duha.

Human niini ang biktima mipunit og bato apan ang suspek nga nakabantay mikuha usab og kutsilyo ug sa tanto nilang buno nadunggaban sa suspek ang biktima.

Gisuwayan pa unta pagdala sa Cebu City Medical Center apan patay na kining naabot gumikan sa lawom nga samad nga naangkon diha sa tuong kilid ug bukobuko. (BANATNEWS)