Gitagod sa papa

CEBU, Philippines - Patay diha-diha ang usa pa ka tuig ug pito ka buwan nga bata human gilambos sa bungbong ug pagkahuman gipatong sa ulingan dayon gitagod-tagod og tigbas sa kaugalingong amahan diha sa ilang pinuy-anan sa sitio Poster Village sa barangay Maravilla lungsod sa Tabuelan pasado alas-3 sa kahaponon sa miaging adlaw.

Sumala pa nga ang suspek miyembro sa gitawag nga “Tagod-tagod” gang apan tungod kay wala makamemoriya sa mga ‘hurim-hurim’ kon orasyon nga gisuwat sa pinulongang Latin nakaapekto kini sa iyang pangisip.

Ang biktima giila sa kapulisan nga mao si James Amper Taglupoc kinsa nakaangkon og daghang samad tinigbasan sa ulo, nawong, ug liog human kini tigbasa sa amahang si Alfredo Taglupoc, 29.

Human sa hitabo si Alfredo miikyas apan nadakpan sa hot pursuit operation ni Insp. Almirante Bacayo sa bukirang barangay sa Kantubaon sa balay sa iyang uyoan kagahapon na sa alas 10:30 sa buntag.

Si PO3 Adolfo Balloba sa Tabuelan Police Station nga nahinabi sa Banat News sa telepono nagkanayon nga nananghid ang suspek sa iyang kapuyo nga si Maribelle Pitogo, 26, nga moadto sa balay sa iyahang amahan kay mag-inom.

Matud ni Balloba nga wala mosugot ug gipugngan ni Marivel ang suspek sa kabalakang kun mahubog manghagis ug mangulata na usab kini kanila.

Tungod niini nasuko si Alfredo maong milakaw si Marivel aron mokuha og saging pipila ka metros gikan sa ilang balay, dihang namatikdan sa suspek nga mibiya ang kapuyo nasuko kini ug ang biktima maoy gipahimungtan.

Si Myrelle Pitogo, 9, igsuon sa biktima misaysay nga iyahang gikugos ang iyang manghod niadtong higayona sa dihang gipugos og kuha sa iyang amahan dungan sa paghulga kaniyang siya patyon kun dili niya buhian ang biktima.

Dihang nakuha, walay daghang estorya gilambos-gilambos sa suspek ang anak makaduha ka higayon sa bungbong hinungdan nga nakuyapan ang bata ug gibutang sa ilahang ulingan ug dayon gitigbas kini makadaghang higayon.

Ang mga silingan pagkasayod sa gibuhat sa suspek daling misusi sa balay apan naglunang sa kaugalingong dugo tungod sa daghang samad nga naangkon niini apan wala na diha ang suspek. “Dagko og tinigbasan ang ilong paingon sa aping, nalangkat ang nawong hasta ang liog gigulgol pa gyud,” matud ni Marivel nga nahinabi sa telepono sa igsuong pamantalaan sa Banat News nga The Freeman.

Matud ni Marivel nga nalisoan sa pangisip ang suspek tungod kay wala makasag-ulo sa orasyon sa gisudlang “Tagod-Tagod” gang.

“Nalisuan siguro siya kay wa siya ka-memorya sa Latin unya karon moingon siya nga wala tuyo-a kay nakalimot lang kuno siya,” matud pang Marivel.

Si Balloba mitug-an nga ang unang asawa sa suspek naghikog pipila na ka tuig ang nakalabay tungod gihapon sa pagkamaoy niini ug pagpanakit.

“Ang first wife ani niya (suspek) naghikog last 2005 or 2006 ba to, kay mao lagi problematic kay makainom magmaoy, manghagis unya mangulata pa gyud,” matud pang Balloba.

Kagahapon sa buntag si Dr. Nestor Sator sa PNP Crime Laboratory niadto sa Tabuelan aron mo-autopsy sa patay’ng lawas sa biktima samtang gipasaka na ang kasong parricide batok sa suspek kagahapon sa hapon. (BANATNEWS)