Kap Cabanes di mag-abc sa talisay

CEBU, Philippines - Ang kapitan sa barangay Tanke, dakbayan sa Talisay mihimakak nga modagan siya isip presidente sa Association of Barangay Captain (ABC) atbang kang Charles Basillote, kapitan sa barangay Dumlog.

Si Kapitan Perla Cabanes sa barangay Tanke mihimakak sa nahisgutang report dihang nahinabi kini sa mga tigbalita.

Si Cabanes ug Basillote parehong kaalyado ubos sa landong sa administrasyon sa dakbayan sa Talisay.

Apan matud ni Cabanes nga dunay seniority ang ilahang grupo, si Basillote maoy senior kaniya ug gipili sa grupong modagan isip presidente sa ABC samtang siya (Cabanes) ang modagan isip bise presidente.

Sa grupo sa oposisyon si Kapitan Marlowe Dagohoy sa barangay Biasong maoy gituboy nga modagan isip Presidente sa ABC ug ang modagan isip bise presidente sa ilang grupo ang kapitan sa barangay Mohon nga si Dario Villaver.

Niadtong Disyembre 1 ug 2, 2010 ang pagduso sa Certificate of Candidacy (COC) ngadto sa secretariat sa ABC sa mga modagang mga opisyal sa ABC.

Ug karong Disyembre 7, 2010 ang adlaw na sa eleksiyon sa ABC. (BANAT NEWS)