CEBU, Philippines - Angol ang usa ka lalaki human kini dunggaba sa walay igong rason sa wala hiilhing tawo didto sa Sitio Kilawan, barangay Tanke, dakbayan sa Talisay sa milabay’ng gabii. Naila ang biktima nga si Val Cabando, 32, nga nagpuyo sa maong barangay.
Si Cabando kauban sa iyang mga higala nga nag-inom sa nahisgutang lugar dihang kalit lang miabot ang kriminal ug dayong dunggab sa biktima.
Nakaangkon og samad dinunggaban ang biktima sa iyang dughan, wala ug tuong bukton.
Dihang nagsakay na siya sa ambulansya nga maoy nagdala kaniya ngadto sa ospital buot unta kining molayat gikan sa maong sakyanan.
Sa pakighinabi sa Banat News kang PO3 Edwin Alvarado, Desk Officer sa Talisay City Police Station, miingon siya nga basin ang biktima gustong molayat gikan sa ambulansya kay basin wala siya’y ikabayad. Apan nadala ra gihapon ang biktima ngadto sa Vicente Sotto Memorial Medical Center sa dakbayan sa Sugbo. Padayon pang gisusi sa kapolisan sa Talisay ang motibo sa pagpanunggab ug sa pag-ila sa kriminal. (BANAT NEWS)