Duha ka puya nakit-an

CEBU, Philippines - Usa ka puya ang napalgan kagahapon sa sitio Huyong-huyong sa barangay Alaska-Mambaling pasado alas 9:30 sa buntag.

Usa ka Rafaela Larbida, 62, fruit vendor molupyo sa maong lugar ug si Geraldine Randall usa ka nurse sa Health Center sa Mambaling, 43, molupyo sa Poblacion, Sibonga maoy nakakaplag sa maong puya.

Sumala pa nila sa kapulisan nga mogamit unta sila sa pangpublikong kasilyas, mao nalay ilang nakit-an ang usa ka fetus nagbitay nga gisulod og plastik.

Dali silang mitawag sa kapulisan ug sa pagsusi sa mga awtoridad gibana-banang unom ka buwan ang maong puya. Kini ilang gidala sa St. Francis Funeral Home.

Sa laing bahin adunay laing puya nga nakit-an sa may Saint Michael Village sa barangay Kasambagan ning dakbayan pasado 8:00 sa buntag.

Usa ka Alfred Soquiño, 28, ug taga Paradise Village daling mitawag sa kapulisan human niya masigpati ang usa ka kadudahang karton nga baho ug dihang iyang gisusi bata ang sulod niini. Matud pa ni PO1 Nilo Aventurado sa Cebu City Police Office (CCPO) nga naa sa unom padulong pito ka buwan ang puya.

Padayon pang gipangita sa kapulisan ang responsableng inahan nga nagbilin sa maong puya. (BANAT NEWS)