Tulo Koreano angol sa aksidente

CEBU, Philippines - Tulo ka mga Koreano ang nangaangol human ang ilang gisakyang rent a car nga Toyota Innova midaro ngadto sa laing sakyanan ug milahos ngadto sa poste niadtong Biyernes sa kaadlawon sa barangay Canduling, lungsod sa Ronda.

Ang nahisgutang mga Koreano mao sila si Sang Ki Han, Dong Hyun Kim ug Jon Huem Kim, apan giingong wala magpadala sa tambalanan tungod kay dili grabe ang ilang mga bun-og ug pangos nga naangkon.

Ang drayber sa sakyanan mao si Miguel Naing, 26, taga barangay Pajac, dakbayan sa Lapu-Lapu.

Base sa imbestigasyon sa kapolisan nga ang mga Koreano gikan sa dakbayan sa Sugbo paingon unta ngadto sa lungsod sa Badian apan pag-abot nila diha sa barangay Canduling usa ka libudsuroy nga iro ang kalit mitabok diha sa karsada.

Si Naing miliso sa manobela sa sakyanan aron dili maligsan ang iro apan milahos hinuon sila ngadto sa gigaraheng Toyota jeep daplin sa karsada ug milahos ngadto sa poste dayon ngadto sa pader sa balay ni Leovehilda Careneo ug naapil og ungad ang mga ornamental plants sa naulahi.

Ang maong Toyota jeep gipanag-iya ni Perpito Ator.

Si PO1 Darwin Melodia, duty desk officer sa Ronda Police Station nga nahinabi sa Banat News kagahapon nagkanayon nga dili hinuon daku ang danyos sa maong aksidente apan gituohan nga ang drayber nakapiyong kini sa iyang mata tungod kay nagduka. (BANAT NEWS)