30 babaye giluwas

CEBU, Philippines - Kapin sa 30 ka mga gituohang mga minor de edad nga kababayen-an ang giluwas sa mga Regional Anti-Human Trafficking Task Force (RAHTTF) sa Police Regional Office-7 niadtong milabay’ng hapon sa barangay Banilad dakbayan sa Sugbo atol sa pagpangronda sa usa ka giingong kasa.

Ang pagpangronda gipanguluhan sa Department of Justice inubanan sa RAHT. Apan walay bisan usa ka opisyal sa maong unit ang mihatag og pamahayag sa media.

Apan usa sa mga sakop sa raiding team nga gikahinabi sa Banat News diha sa scene ang mga naluwas nga kababayen-an dad-on sa buhatan sa Department of Social Welfare and Development.

Walay kagubot nga nahitabo sa maong operasyon sanglit giingong mikooperar ang wala nila hinganling mga responsable sa operasyon sa maong kasa. Base sa nakuhang impormasyon sa Banat News diha sa dapit, giingong sagad sa mga naluwas pulos dili taga Sugbu.

Ang maong pagpangronda pinasubay sa Republic Act 9208 o Anti Trafficking in Person Act of 2003.

Ang Banat News misuway og tawag sa buhatan sa RAHTTF apan ang nakatubag sa telepono nagdumili sa pagluwat og pamahayag sanglit mopagawas lang sila og opisyal nga pamahayag sulod ning semanaha.

Ang mga responsable anaa karun sa buhatan sa Regional Police Office ug padayun pang gitun-an ang ipasakang kaso. (BANAT NEWS)