CEBU, Philippines - Gibanabanang mikabat sa P90 mil ang kantidad sa salapi nga nasakiyo sa duha ka wala hiilhing kawatan kinsa milungkab sa municipal treasurer’s office ug kumbento sa lungsod sa Poro isla sa Camotes, sa miaging kaadlawon.
Apan ang nahitabo sa buhatan sa tresurera sa munisipyo sa maong lungsod kagahapon na sa alas 7:00 sa buntag hisayri dihang nangabot na ang mga kawani sa maong buhatan.
Subay sa spot report gikan sa Poro Police Station nga nadawat sa Cebu Police Provincial Office (CPPO) nasayran nga ang duha ka kawatan pulos mga menor de edad kinsa didto moagi sa luyong bahin sa munisipyo pinaagi sa pagguba sa jalousy sa bintana sa opisina sa DSWD dayon didto kini moagi paingon ngadto sa buhatan sa municipal treasurer.
Didto sa buhatan sa treasurer’s office giligwatan ang kaha de yero hinungdan nga na-abli ug nakuha gyud ang gibana banang P90 mil nga kwarta sa maong buhatan.
Samtang nahibaw-an usab nga sa wala pa ang hitabo, unang nalungkab sa mga kawatan ang kombinto sa Sto. Niño Parish sa Poro nianang gabhiona ug bugtong nakuha niini ang P200 lang og pagkahuman gisunod nila paglungkab ang treasurer’s office. Sa paghimo ning maong balita padayon pang gipangita sa kapolisan ang mga kawatan. (BANAT NEWS)