Dakong populasyon di hinungdan sa kakabus - pro-life

CEBU, Philippines - Dili ang kadako sa populasyon ang hinungdan sa nagkadaghang kabus dinhi sa nasud sumala pa sa usa ka pro-life advocate atol sa gihimong forum nga gipasiugdahan sa Pro-Life Group sa Visayas Region sa ilahang “I love Life” campaign kagahapon sa Banilad Center for Professional Development kagahapon sa buntag.

Si Dr. Rodrigo Alenton, presidente sa Philippine Heart Association sa Northwestern Mindanao kinsa usa sa mga resource speaker sa maong forum nagkanayon nga kun mapasar ang Reproductive Health Bill magbunga lang kini og daghang problema.

Gikabalak-an ni Alenton nga inay momenus ang gidaghanon sa mga kaso sa aborsyon modaghan na hinuon kini ug mosaka usab ang mga kaso sa suicides ug uban pa.

Ang mga magbabalaod naninguhang mapasar ang maong balaudnon tungod sa nagkadaiyang mga rason sama sa over population, kakabus, edukasyon ug panglawas sa mga inahan.

Apan si Alenton miingon nga dili ang kadako sa populasyon o sa gidak-on sa pamilya ang hinungdan sa kakabus sa mga pamilya sa nasud kondili tungod sa grabeng kurapsyon diha sa gobiyerno.

Si Dr. Delia Mediano, kanhi Professional Regulatory Commission direktor miingon nga adunay probisyon sa RH Bill nga daw magpugong sa mga ginikanan nga mobadlong sa ilang mga anak nga dili malambigit sa pre-marital sex.

Hinuon ang grupo wala makapakita og kopya ngadto sa mga sakop sa media sa giingong probisyon sa RH Bill.

Sigon pa ni Dr.Anabella Guardiario, usa ka pulmonologist, nga ang artificial contraceptives nga giduso sa RH Bill walay maayong ibunga sa panglawas sa tawo tungod kay magdala hinuon kini og sakit sama sa kanser.

Dugang pa niya nga mas maayong mogamit ang magtiayon og natural family method. (BANAT NEWS)