CEBU, Philippines - Usa ka 30-anyos nga lalaki kinsa giingong misuway og baligya og shabu ngadto sa mga polis nga paingon mangronda nasikop uban sa gikatahong level 2 nga drug pusher sa dakbayan sa Talisay kagahapon sayo sa buntag diha sa sitio Magay, barangay Tanke.
Ang giingong misuway og baligya og shabu ngadto sa mga polis mao si Jonrie Surigao samtang ang gikatahong level 2 drug pusher nga subject sa search warrant mao si Joven Bazar, 63, ang duha parehong residente sa nahisgutang dapit. Ang mga polis nga mironda mao sila si SPO4 Ernesto Navales, SPO3 Ferdinand Navales, SPO1 Benjamin Sebellita, SPO1 Isaias Cabuenas, SPO1 Edgar Causon, PO3 Romeo Ramas ug PO2 Charles Gomez. Dala sa mga sakop sa Provincial Anti-Illegal Drug Special Operation Task Group (PAIDSOT-G) ang search warrant nga giluwatan ni Judge Edito Enemecio sa Regional Trial Court Branch 25 sa dakbayan sa Danao batok kang Bazar.
Nakuha gikan sa posisyon ni Surigao ang 40 ka gagmay’ng silver nga paketeng shabu nga giusa og sulod sa usa ka medium nga plastic human iyang gihagad ang milabay nga mga polis sa iyang shabu.
Samtang atol sa pagsiksik sa balay ni Bazar na-recover sa mga polis ang duha ka medium nga paketeng shabu ug lima ka gagmay’ng paketeng shabu ug usa ka kalibre .357 nga revolver ug lima ka buhing bala niini. - BANAT NEWS