16-anyos nga Australyana gilugos

CEBU, Philippines - Usa ka menor de edad nga Australian ang mireklamong giunay og lugos sa iyang amigo niadtong Martes sa kaadlawon diha sa barangay Patupat, lungsod sa Barili.

Ang suspetsado kinsa nagtingkagol karon sa Barili Police Station detention cell ang 18-anyos nga residente sa nahisgutang barangay ug mag-atubang og kasong pagpanglugos may kalambigitan sa kalapasan sa Akta Republika 7610 kon “Violation Against Women and Children Act”.

Si Police Senior Inspector Marlon Gumabao, hepe sa Barili Police Station sa pakighinabi niini sa Banat News kagahapon mibutyag nga ang biktima mianha kini sa barangay Patupat mibisita sa iyahang higalang tomboy.

Ang biktima giingong nahadlok na kining miuli ngadto sa Carcar tungod kay naabtan na og gabii ug diha na lang natulog sa balay sa iyang higala apan iyang namatngunan nga si Fajardo diha na sa iyang tupad.

Ang biktima nauwaw pagsinggit sa kabalakang makasamok siya sa tagbalay tungod kay bisita lang siya apan misuway siya og lugnot apan gibaharan siya nga dili na lang mosukol hinungdan nga milampos ang suspek.

Nianang pagkabuntag Amipauli ngadto sa Carcar ang biktima ug misumbong kini sa iyang ginikanan hinungdan nga gikuyogan siya sa iyang ama-ama nga misumbong sa mga polis. Ang suspek nadakpan dayon sa hot pursuit operation diha sa balay niini nga natulog.

Si Fajardo nangangkon nga uyab niya ang biktima apan ang biktima mihimakak sa pangangkon niini tungod kay managhigala lang sila.  - BANAT NEWS