Sikyu nakigpinusilay

CEBU, Philippines - Angol ang usa sa duha ka tulisan ug kritikal sab ang kahimtang sa usa ka gwardiya sa usa ka gasolinahan human kini nagkapinusilay sa duha ka mga tulisan nga nagpakaaron-ingnon nga kustomer dayung deklarar og tulis diha sa Star Oil Gas Station sa barangay Langtad lungsod sa Naga niadtong Miyerkules sa alas 8:30 sa gabii.

Bisan samaron ang gwardiyang si Armando Callao, konektado sa Presa Security Agency nakigpinusilay kini sa mga tulisan, gituohang may usa sa duha ka nagmotorsiklong tulisan ang naigo ni Callao base sa nakitang patak sa mga dugo.

Base sa imbestigasyon, ang duha ka tulisan nagsakay og motorsiklo nga Honda-XRM nga kolor itom.

Matud ni PO1 Orlan Condes sa Naga Police Station dihang nahinabi sa Banat News base sa imbestigasyon ang mga tulisan miabot ug nagpatobil ug pagkahuman ang drayber niini niduol sa cashier.

Apan inay nga mobayad midiretso kini og tion sa iyang armas nga kalibre .45 ngadto sa cashier dayung deklarar og tulis apan ang gwardiya nga si Callao nga diha sa gawas nga nakabantay daling miduol aron pagsusi.

Apan ang angkas niini nga maoy nahabilin sa motorsiklo dali sab dayung mibunot og armas ug mipusil kang Callao ug naigo sa dughan apan nakabawos ang naulahi hinungdan nga nangaratol ug mibalik pagsakay sa motor aron mosibat.

Sa pagresponde sa mga polis ilang naabtan si Callao nga samaron ug daling gihatud sa South General Hospital.

Base sa pagsusi sa crime scene giingong adunay mga lama sa patak sa dugo sa gikahimutangan sa mga tulisan hangtud na sa ilang pag-ikyas atol sa pinusilay hinungdan nga dako ang pagtuo sa mga imbestigador nga adunay naigo si Callao sa duha.

Nakuha usab ang duha ka buhing bala sa kalibre .45, usa ka deformed slug sa kalibre 45; upat ka basiyo sa bala sa kalibre .45, siyam ka basiyo kalibre .9mm nga gikan sa armas ni Callao.

Matud pa ni Sr. Supt. Erson Digal nga tulis gyud ang motibo sa maong krimen, apan gidemalas lang ang mga tulisan gumikan kay wala silay nadala tungod kay alerto ang gwardiya.

Gisusi na sa kapolisan ang tanang mga tambalanan sa Sugbu sa pamasin nga gidala kini sa kauban aron patambalan apan napakyas ang mga polis.

Sumala pa ni PO2 Kent Cabrera sa Banat News nga pipila ka bulan ang nakalabay niining tuiga gitulis na usab ang maong gasolinahan ug nakuhaan og P5 mil samtang ang gwardiya mitubag sa tawag sa kinaiyahan.  - Darrel Carumba, Brenda Batuto ug Rey Pasaporte (BANAT NEWS)