CEBU, Philippines - Ang inahan sa napatay nga gipasanginlang tulisan nga si Ronron Go nga si Janet Badana nanghinaot karong kapaskuhan nga matubag na ang gipangayo niyang hustisya sa kamatayon sa anak.
Si Badana nagdumili sa paghatag og komentaryo kabahin sa dagan sa kasong iyang gipasaka batok kang SPO1 Adonis Dumpit nga maoy iyang gitumbok nga mipusil sa iyang anak.
Matud pa niya nga nahatud na nila ang tanang ebidensya ug aduna nay mga pamahayag nga ilang gisumiter aron pagsuporta sa mga ebidensya sa ilang habig ug malaumong paigo na kini aron makab-ot ang hustisya sa anak.
“Everytime nga moabot ang Pasko moagi pa ko og depression kay ang December 14 sumad kana sa kamatayon sa akong anak, dili gyud malipayon akong Pasko,” matud pang Badana.
Sumala pa niya nga matag moabot ang kapaskuhan subling mobalik sa iyang huna-huna ang kasakit nga nawad-an siya og anak ug unom na ka tuig na niya kining giantos.
Bugtong gipangayo ni Badana mao ang hustisya alang sa iyang anak kinsa gipasanginlang nakigpinusilay kang Dumpit niadtong tungura. (BANAT)