CEBU, Philippines - Napulo ang naangol apil na ang duha ka drayber human nagkarambola ang sakyanan nga nagkadinasmagay dihang mikawat og linya ang hubog nga drayber sa 10-wheeler trucks nga gikasugat didto sa barangay Inayagan lungsod sa Naga niadtong Martes sa alas 6:30 sa gabii. Apil sa mga naangol mao ang 10-anyos ug usa pa ka tuig nga anak babaye sa sidewalk vendor nga sila si Joane Sabosap ug Jamaica Sabosap ug ang naguba nga payag sa usa ka Felix Lapitan daplin sa karsada ug nabungkag usab ang kongkretong pader sa Petron Gasoline Station.
Ang mga nalambigit nga sakyanan mao ang Isuzu Forwarder nga gimaneho ni Cansancio Jonathan Pantojan, taga Campo-2 siyudad sa Talisay; Toyota Corolla, nga gimaneho ni Silvestre Artemio; Isuzu Fuego pickup nga gimaneho ni Ricky Candol Canonigo, taga Lutak Naga; Suzuki service multicab gimaneho ni Roger Nadela Alforque, taga sitio Bayong, Inayagan, Naga; Natalie bus nga gimaneho ni Danilo Tabotabo Espina, taga Salamanca,Tuboso, Negros Occidental; multicab nga pasaheroan nga gimaneho ni Ernesto Blanco taga Cabantan, Mabolo ug ang nakadasmag nga 10-wheeler flatbed truck, nga gimaneho usab ni Lucio Taborada Villacencio, taga Balud, San Fernando.
Ang mga naangol nga pasahero mao sila si Juliet Ruben, 28, taga Inayagan; Janice Cabine, 36, taga Bacayan, Cebu City; Michael Randila Yeung, 31, taga Mojon siyudad sa Talisay; Glenda Torenoba, 33, taga Belpal, Minglanilla; Juliet Lembo,28, taga Cogon, Naga; Gilda Basanta, 37, ug Jocelyn Echavez, 37, pulos taga Inayagan, Naga.
Samtang apil sa naangol ang drayber sa multicab nga pasaheroan nga si Blanco ug ang drayber sa 10-wheeler truck nga giingong hubog nga si Taborada.
Matud pa ni PO2 Ken Cabrera sa Naga Police Station dihang nahinabi sa Banat News subay sa imbestigasyon si Taborada miangkong nakainom nga gikan sa siyudad sa Sugbo ug paingon sa habagatan.
Sumala pa nga ang tanang nadasmagang sakyanan ni Taborada pulos niya gikasugat nga paingon sa dakbayan sa Sugbo nga sugat ang posisyon.
Pag-abot sa nahisgutang lugar giingong mikawat sa pikas linya ang 10-wheeler truck ug giharos og pamangga ang mga nahisgutang mga sakyanan ug tungod sa kakusog sa impact ang ubang mga sakyanan midaro usab sa payag ni Felix Lapitan daplin sa dalan.
Lakip sa gidasmagan sa trak ang kongkretong paril sa Petron Gas Station ingon man naangol usab ang duha ka mga bata nga anak sa sidewalk vendor nga diha naninda daplin sa karsada adtong tungura. Ang mga biktima daling gidala sa South General Hospital samtang ang drayber sa truck misibat apan mitahan sa iyang kaugalingon sa kapulisan sa lungsod sa San Fernando ug gitugyan sa kapulisan sa Naga diin kasamtangang nabalhog samtang nagpaabot sa tukmang sumbong nga ipasaka batok niya. (BANAT)