Lantaka, pugakhang i-regulate - Labella

CEBU, Philippines - Idili na unya sa dakbayan sa Sugbo ang paghimo ingon man ang paghupot og pugakhang, lakip na ang lantaka kun maaprubahan ang ordinansahon ni Konsehal Edgardo Labella.

Ang kawayan, mga lata sa preserbatibong pagkaon, ug pvc pipes maoy gigamit karon sa kabataan ug bisan na sa mga hamtong aron himuong lantaka.

Niadtong milabay’ng tuig usa ka 6-anyos nga batang lalake sa dakbayan sa Talisay ang nabuthan sa lantaka diha tungod sa iyang nawong ug ang pagboto nakaapekto sa iyang kasing-kasing ug baga hinungdan nga kini nakabsan sa kinabuhi.

Ang giingong pugakhang kun (homemade shotgun) mabalahan og pellets ug jolen nga maoy gamiton sa mga kabataan ilabi na panahon sa kapaskuhan.

 Nahuna-hunaan ni Labella ang pag-ban sa pugakhang ug pag-regulate sa lantaka, tungod usab sa risgo nga mahatag niini ilabi na sa kabataan ug kini hisgutan sa sesyon karong adlawa.

Base sa resolusyon sa konsehal, ang unang kalapasan pamultahon og usa ka libo ka pesos apan dili molapas sa duha ka libo ka pesos. Ikaduhang kalapasan makamulta og duha ka libo ug dili molapas sa tulo ka libo ka pesos. Ikatulong kalapasan pamultahon og tulo ka libo ug dili molapas sa lima ka libo ka pesos nga kantidad. (BANAT)