CEBU, Philippines - Sugod kagahapon sa alas 12:00 sa udto, Nobiyembre 30, 2010, napupos na sa hingpit ang serbisyo sa mga opisyal sa barangay ug sa Sangguniang Kabataan (SK), human sa gipahigayong eleksyon sa barangay ug SK niadtong Oktubre 25, 2010, sumala pa ni Regional Director Pedro Noval Jr. sa Department of Interior and Local Government (DILG)7.
Sa samang higayon si Noval nagkanayon nga mi-epekto na usab sugod kagahapon sa udto ang pangatungdanan sa tanang bag-ong napili nga opisyal sa barangay ug SK.
Matud pa ni Noval nga ang election sa Association of Barangay Councils (ABC) sa Disyembre 7, dumalahon sa mga komitiba nga gitukod alang ning maong kalihokan.
Dinhi sa dakbayan sa Sugbo, ang milingkod isip bag-ong presidente sa ABC ug awtomatikong ex-officio member sa konseho sa dakbayan sa Sugbo sugod kagahapon mao si kapitan Michael Ralota, sa barangay T. Padilla.
Si Ralota kinsa maoy bise presidente sa ABC ning dakbayan maoy mohulip sa puwesto nga nabakante ni kanhi kapitan Eugenio Faelnar sa barangay Guadalupe kinsa mao usab ang nahimong presidente sa ABC kutob kagahapon.
Apan matud pa ni Noval nga wala na magpapili si Faelnar sa pagka-kapitan sa barangay, busa awtomatik usab nga nabahas ang iyang pangatungdanan isip presidente sa ABC sugod kagahapon.
Kun nagpabilin pa siyang kapitan sa Guadalupe, dili pa usab unta siya matangtang sa pagka-ABC presidente ning dakbayan hangtod nga adunay mapili nga bag-ong ABC presidente unya sa Martes. (BANATNEWS)