Motor nadasmag 4 angol

CEBU, Philippines - Naangol ang upat ka tawo dihang nadasmag sa bakilid nga bahin sa karsada ang motorsiklo nga ilang gisakyan gumikan kay giingong hubog sa bino de taranta ang drayber niini didto sa sitio Tingub, barangay Lagtang, dakbayan sa Talisay kagahapon sa alas 6:00 sa buntag.

Ang mga biktima mao sila si Pilagio Villanueva, 31, kinsa maoy drayber sa motorsiklo, Lusilla Broro, 29, Celesti Adobo, 17, ug George Baroro, 25, ang tanan pulos taga barangay Lawaan III sa maong dakbayan.

Sumala sa mga tinugyanan sa Traffic Division sa Talisay nga nagpaingon ang mga biktima sa barangay Jaclupan sa maong dakbayan gikan sa Tabunok, dihang pag-abot niini didto sa Tingub nag-ikis-ikis ang dagan sa motor mura usab og hubog hangtod nga nasungag kini sa bakilid nga bahin sa daplin sa karsada.

Ang tanan pulos nangabali ang kalawasan uban sa mga bun-og ug mga samad.

Nasayran nga una manggikan sa Tabunok ang mga biktima gibati na kini og kabungog sa bino nga ilang giinom.

Hinuon relaks kaayo sila karon sa Talisay District Hospital sa ilang pagpahuway. (BANATNEWS)