Sikyu gikawatan kay natulog

CEBU, Philippines - Gumikan kay nakatulog, nagtibi ang usa ka security guard nga misumbong sa kapolisan kay gipupho sa wala hiilhing kawatan ang mga butang nga iyang gibantayan   didto sa sitio Buena Hills, barangay Guadalupe, ning dakbayan sa Sugbo kagahapon sa kaadlawon.

Si Charlito Rica, 22, ulitawo nga taga B. Aranas Extension, ning dakbayan sa Sugbo misumbong sa kapolisan nga pagmata pa niya kagahapon sayo sa buntag, sinaw na ang nagkalainlaing mga butang nga iyang gibantayan.

Kini naglakip sa 40 metros nga duplex wire, 3 ka kahon nga electrical wire, welding clamp, mga senina, sapatos ug cell phone nga gipanag-iya   sa usa ka trabahante nga si Rommel Elladora.

Si Rica nga ubos sa JKits Security Agency miangkon sa kapolisan nga puwerting hinanoka niya sa pagkatulog dihang gihilom og signit sa wala hiilhing kawatan ang nahisgutang mga butang.

Gibanabana niya nga mga alas 2:00 gyud sa kaadlawon nahitabo ang maong pagpangawat, kay sa pagmata nianang alas 3:00 sa kaadlawon nahanaw naman ang maong mga butang.

Sa pagkakaron padayon pang gipangita sa kapolisan ang mga kawatan. (BANATNEWS)