CEBU, Philippines - Gipahibalo sa Squatters Prevention Encroachment and Elimination Division (SPEED) nga alerto karon ang ilang grupo gumikan kay nagbaha ang mga sidewalk vendors nga naggikan pa sa mga dapit gawas sa Sugbo.
Suma pa ni Noel Artes, hepe sa SPEED nga ingon gyud niini ang kahimtang ning dakbayan basta magkaduol na ang adlaw sa Pasko.
Base sa kasamtangang resulta sa survey nga gihimo sa SPEED, mikabat na sa kaping 4,000 ka mga manindahay sa daplin sa karsada ang nia karon sa siyudad ug wala pa’y labot niini ang vendor nga mopuwesto sa ilang mga baligya panahon sa kagabhion.
“Grabe kadaghan sa mga vendor nga mangabot dinhi ilabi na kung buwan sa Disyembre, aduna man gani mga mamaligyaay nga taga-Luzon ug ubang parti sa Mindanao,” matud pa ni Artes.
Mga prutas maoy kasagaran karon sa mga nangasakmit nga mga baligya sa kadalanan nga gi-display bisan asang lugara nga miresulta na hinoun sa bug-at sa dagan sa trapiko sa kadalanan.
Ang tindera nga magpataka og display sa ilang mga baligya , makamulta og P500 . Kung duha ka higayon na kini madakpan, moserbisyo sila sa buhatan sa SPEED, matud pa ni Artes.
Samtang konpiskahon usab ang mga kariton ug ang mga baligya sa tindera kung katulo na kini ka higayong madakpan.
Ang mga makonpiskar nga mga baligya, idonar sa SPEED ngadto sa mga orphanage o ba kaha sa mga foundation.
Sumala pa ni Artes nga adunay ubang mga sidewalk vendor nga inig kahuman nila og baligya, pipila niini ipamilin lang ang ilang mga butang sa kadalanan sama sa lamesa, bangko ug uban pa hinungdan mababagan na hinuon ang mga agianan sa mga tawo. (BANATNEWS)