Duha giluba sa nag-wild nga hubog

CEBU, Philippines - Duha ang naangol human nag-wild ug nagpataka og panunggab sa mga tawong nag-videoke ang usa ka hubog nga giingong nasuko tungod kay wala hatagi sa iyang gi-order nga beer tungod kay wala na kini kwartang ikabayad diha sa usa ka imnanan sa barangay Poblacion sa lungsod sa Carmen kagahapon sa alas 3:00 sa kaadlawon.

Ang mga biktima mao si David Bejoc, ug si Niño Suico, nagpuyo gihapon sa maong dapit. Samtang ang suspek mao si Ruben Kiamko, 61, taga Poblacion Carmen.

Matud ni PO3 Dario Baguio sa Carmen Police nga maoy usa sa miresponde sa alarma dihang nahinabi sa Banat News nga ang mga biktima nag-inom ug nagkanta-kanta samtang ang suspek nag-inusara lang og lamisa nga nag-inom.

Matod pa nasuko ang suspek human wala na kini hatagi pa og beer dihang ni-order sa tindira tungod kay wala na kini kwarta hinungdan nga namugos kini ug gigarantiya ang iyang cellphone ug usa ka kahang sigarilyo aron mahatagan sa beer apan wala gyud mosugot ang tindira.

Sa walay igong rason kalit nga milanit ang suspek og kutsilyo dayon nanghagit ug nangita’g away hinungdan nga gialam-alaman kini sa mga tawo apan kalit kining nagpataka og dunggab sa mga tawo.

Si Suico naigo sa tiyan samtang si Bejoc naigo sa walang bahin sa bukton hinungdan nga gitabangan og layog sa mga tawo ang suspek ug gipadakop sa polis.

Diha ra nasayran nga nasuko kining wala na hatagi og beer nga gi-order human masutang wala kini ikabayad. Samtang ang mga biktima gihatud dayun sa Danao district hospital alang sa medikasiyon. (BANATNEWS)