Mga mag-uuma gitudloan og teknik

CEBU, Philippines - Gitudloan sa kagamhanan sa dakbayan sa Sugbo ang mga mag-uuma nga mosagop sa sistema sa pagbutang og mga kanal o drainage, ug paggamit og itom nga plastic aron itabon sa ilang mga tanom sa kaumahan.

Kini sa dihang nasud-ong sa mga kadagkuan sa City Agriculture Office nga wala na magkadimao ang produksyon sa kaumahan sa bukid tungod sa pag-usab sa klima kon climate change.

Ning panahona, kun mouwan grabe na kaayo ang uwan, ug kun moinit ang panahon grabe usab kaayo kainit sa palibot.

Maoy hinungdan nga ang assistant city agriculturist Arlie Gesta miingon nga gitudloan nila ang mga mag-uuma sa kabukiran nga manganal gyud kay kun dili nila kini buhaton mahurot og banlas ang ilang mga tanom ilabi na ang anaa sa banghilig nga yuta gumikan sa walay puas nga ulan.

Unya matud pa ni Gesta nga gawas sa pagsagop sa drainage system nga ila pa usab nga gitudloan ang mga mag-uuma sa plastic mulching technology.

Kini pinaagi sa paggamit og itom nga plastic nga itabon sa mga tanom aron nga dili masobrahan sa tubig ug dili malata ang mga tanom.

Matud pa ni Gesta nga karong nausab na ang klima sa panahon dinhi sa kalibotan kinahanglang mag-inabtik usab ang mga mag-uuma pinaagi sa pagpangita og paagi nga hiapsan kining dagan sa panahon ug makaproduksyon gihapon og daghan pinaagi sa pagsagop sa mga inutok nga paagi sa pagpanguma. (BANATNEWS)