CEBU, Philippines - Samdan ang usa ka mag-uuma human kini pusila sa iyang silingan didto sa barangay Kawasan, lungsod sa Aloguinsan sa miaging gabii. Ang biktima mao si Ponciano Degano, 38, minyo nga taga Kawasan, samtang ang suspetsado mao usab si Jansine Resuento, hingkod, nga silingan sa biktima.
Sumala sa kapolisan nga nagbarog atubangan sa usa ka tindahan ang biktima dihang kalit lang miabot ang suspetsado ug walay daghang estorya gispusil niini ang dapi-dapi sa biktima.
Nakasinggit og panabang ang biktima ug daling miduol, kaniya ang barangay tanod nga si Cecar Mantalaba, kinsa maoy mihatod dayon kaniya ngadto sa tambalanan.
Samtang ang suspetsado dali kaayong nakasibat ug mipahilayo sa maong lugar.
Gituohan sa kapolisan nga may karaang panagdumot ang biktima ug ang suspetsado.
Padayon pa nila karong gipangita ang suspek. (BANATNEWS)