Gipusil sa sikyu, bala miungot

CEBU, Philippines - Samdan ang usa ka ulitawo human kini pusila sa usa ka security guard didto sa barangay Lawaan, dakbayan sa Talisay sa miaging gabii.

Ang biktima giila nga si Jason Nuñez, 18, ulitawo nga taga Lawaan, samtang ang suspetsado nailhan usab nga si Arturo Acabo, hingkod nga ubos sa A and J Security Agency nga nagbase sa dakbayan sa Sugbo.

Si PO2 Henry Mata sa Talisay City Police Office mibutyag sa Banat News nga naglakaw ang biktima kauban sa suspetsado ug uban pa nilang mga kauban sa trabaho sa usa ka tindahan sa ukay-ukay. Apan samtang naglakaw sila kalit lang gilanit sa suspetsado ang iyang service firearm ug giluthang ang biktima. Naigo sa ubos nga bahin sa tuong mata ang biktima, unya miikyas dayon ang suspetsado ug gibiyaan ang biktima ug ang mga kauban niini sa trabaho.

Mitiurok usab sa kakurat ang mga kauban sa biktima ug wala na kini mogukod pa sa suspetsado.

Nasayran gikan kang PO2 Mata base sa gisugilon sa biktima ug sa mga kauban niini nga niadtong Biyernes sa buntag nagkalalis ang biktima ug ang suspetsado gumikan sa personal nga butang.

Gani giingong gikulata pa usab sa suspetsdado ang biktima gumikan sa maong lalis nga sila ray nasayud apan nahusay ra kini sa ilang amo.

Nianang pagka-hapon wala magdahom ang biktima nga pusilon siya sa suspetsado, hinungdan nga kompiyansa ra usab kining milakaw kauban sa grupo sa ilang mga kauban sa trabaho ug ang suspek dihang nasugamak hinuon siya sa dakong disgrasya.

Gihatod dayon ang biktima ngadto sa Vicente Sotto Memorial Medical Center sa dakbayan sa Sugbo. Nasayran nga miungot ang bala sa bukog sa ubos nga bahin sa tuong mata sa biktima. (BANATNEWS)