CEBU, Philippines - Patay ang usa ka caretaker sa usa ka farm human kini gipusil sa wala hiilhing tawo sa Minolos 1, sa barangay Matabang, Toledo kagahapon sa kaadlawon.
Giila ang biktima nga si Felix Maturan, 53, residente sa sitio Lukod barangay Arpili, lungsod sa Balamban, usa ka caretaker sa farm nga gipanag-iya ni Tommy Baena.
Nakit-an ang biktima sa iyahang kauban nga caretaker nga si Aldren Carampatana nga wala nay kinabuhi ug dunay pinusilan sa ulo ug sa tuong abaga nga naghigda sa usa ka kawayan nga katre sulod sa ilang gipuy-an.
Si Carampatana nga gikan sa disko sa Minolos 3 sa susamang barangay ug nakurat nalang kini sa pag-abli niya sa pultahan sa ilang gipuy-an tungod kay wala nay kinabuhi ang biktima.
Ang biktima gituohang gipatay pasado alas 11:00 pa sa gabii ug nadiskubrehan kini pasado alas 2:00 na sa buntag ni Carampatana.
Ang mga silingan nakadungog og sunod-sunod nga buto apan ila lang kini gibalewala sa pagtuo nga mga firecrackers lang kini.
Narekober gikan sa crime scene ang usa ka slug, upat ka kabhang sa .9 mm kalibre, usa ka buhing bala sa .9 mm ug duha ka magazine sa Ingram machine pistol nga adunay tag-15 nga buhing bala.
Nagtuo ang kapolisan nga posibleng dili lang usa ka tawo ang mihimo sa maong krimen. Padayon pa ang imbestigasyon pagtino sa motibo sa pagpamusil ug sa pag-ila sa kriminal. (BANATNEWS)