CEBU, Philippines - Gipabahaan na sa kagamhanan sa dakbayan sa Mandaue og mga hinabang ang tanang nabiktima sa sunog sa sitio Bildohan sa barangay Looc, sitio Anakma sa barangay Pagsabungan, Perez Compound sa barangay Alang-Alang ug sitio Centro sa barangay Labogon sa maong dakbayan.
Kini pinaagi sa pagpaubos sa state of calamity sa maong mga lugar.
Ang buhatan sa City Social Welfare Office (CSWO) nga gipangulohan ni Violita Cabada nagpadayon usab sa pagpanghatag og pagkaon sa mga biktima sa sunog sa Labogon.
Si Mayor Jonas Cortes kinsa personal nga misusi sa kahimtang sa mga biktima sa maong katalagman nangita usab og dugang mga paagi sa pagtabang kanila.
Si barangay kapitan Damaso Tumulak sa Labogon nga nahinabi sa Banat News mibutyag nga mga sinakong bugas usab ang ilang giandam alang sa mga biktima ug giabagan usab sila sa mga pribadong pundok kinsa nanghatag og mga sapot, habol, banig ug kagamitan sa panimalay.
Matud pa ni Kapitan Tumulak nga si Mayor Cortes mipadala na og mga kawani sa city health office ngadto sa mga nasunogan aron sa pagsusi sa panglawas sa mga biktima ilabi na sa mga kabataan. (BANAT NEWS)