Tugbong-Tabo ipahigayon ning siyudad

CEBU, Philippines - Ang buhatan  sa Cebu City Agriculture mipasiugda og programa nga Tugbong Tabo dinhi ning dakbayan dili pa dugay.

Ang Tugbong Tabo usa ka matang sa merkado nga puro produktong pagkaon gikan sa kaumahan ang mga baligya nga tinumod sa mga mag-uuma gikan sa nagkalainlaing dapit ning dakbayan matag semana.

Ang maong programa gilusad aron ang mga mag-uuma makasapi sa ilang mga produkto sa kaumahan direktamente ngadto sa mga pumapalit ug dili na mag-agi og ahente.

Si Arlie Gesta, ang Assistant City Agriculturist, mibutyag sa Banat News nga may napulo pa ka barangay ang misalmot niining maong kalihokan.

Dugang pa niya nga dako og ikatabang kining maong programa sa mga mag-uuma kay makasabot-sabot man sila sa presyo sa ilang produkto.

Matod pa niya nga mopahigayon sila og Agri-Fair duha ka higayon matag tuig nga himoon atol sa Charter Day ug sa bulan sa Hulyo, ang bulan sa Nutrisyon.

Sa maong mga higayon ilang ipamaligya   ang mga nagkalain-laing produkto gikan sa mga bukirang bahin sa Sugbo sa barato nga presyo. (BANAT NEWS)