CEBU, Philippines - Mikapin sa 50 ka mga kaso sa pagpanulis ang natala sa Thief and Robbery Section (TRS) sa Talisay City Police Office gikan sa buwan sa Hunyo hangtod Nobiyembre niining tuiga.
Sumala sa kapolisan nga sa buwan sa Hunyo duha ka pagpanulis ang narehistro sa ilang buhatan,sa pagka Hulyo 12; Agusto 5, Septembre 13, Oktubre 12, ug sa Nobiyembre 9 ka kaso.
Ang labing nga kaso nga natala sa kapolisan mao ang tulis nga nahitabo niadtong Nobyembre 25 niining tuiga.
Kini kabahin sa usa ka estudyante sa nursing nga gibiktima ug gitulis sa tulo ka mga lalaki sulod sa PUJ duol sa usa ka gasolinahan sa barangay Bulacao, dakbayan sa Talisay.
Sa pakighinabi sa Banat News kang Superintendent Henry Biñas, hepe sa kapolisan sa Talisay nga matud pa niya mikabat sa 70 ngadto sa 80 porsyento nga kaso sa tulis ang nasulbad lakip na niini ang pagkadakop sa mga suspetsado.
Dugang pa ni Biñas nga sa ‘Ber month’ mosaka ang kaso sa pagpanulis ug pagpanglungkab.
Iyang gisugyot ang mga barangay tanod nga motambayayong kanila tungod kay gamay ra ang puwersa sa kapolisan.
Si Biñas midugang nga karong tuiga mikunhod ang kaso sa pagpanulis kun itandi sa miaging tuig. (BANAT NEWS)