Butuanon bridge ipaayo

CEBU, Philippines - Si Congressman Gabriel Luis Luigi Quisumbing sa ika-unom nga distrito mihangyo na kang Kalihim Rogelio Singson sa Department of Public Works and Highways ( DPWH ) nga ipaayo ang Butuanon Bridge sa barangay Ibabao siyudad sa Mandaue.

Gipahibawo ni Quisumbing si Singson nga mihimo na siya og endorsement alang sa pag-ayo sa 46.59 ka metros nga Butuanon Bridge tungod sa mga liki sa maong taytayan nga nakatay-og sa kalig-on niini.

Matud pa ni Quisumbing nga ubay-ubay na sa mga opisyales sa Mandaue ang mihangyong ipaayo ang maong taytayan aron malikayan ang disgrasya.

Gipasabot ni Quisumbing nga iyang nasayran nga dili prayoridad ni Kalihim Singson ang maong proyekto sanglit may dagko pang mga proyekto nga giuna karon ubos sa Aquino Administration.

Apan gipanghinaut lamang sa kongresista sa sixto distrito nga tagdon ang iyang hangyo.

Si Quisumbing misaad nga andam siyang mogahin sa iyang Priority Development Assistance Fund (PDAF) alang sa pagpa-ayo sa maong latayan apan mag-agad siya sa buhatan ni Sec. Singson nga maoy mopatuman sa maong proyekto.

Nasayran nga ang DPWH sa Central Visayas mipahigayon og structural investigation sa maong tulay niadtong milabay’ng bulan apan wala kini morekomendar nga ipaayo ang Butuanon Bridge.

Hinuon ilang gidid-an nga makaagi sa nahisgutang taytayan ang mga dagkong mga trak kay 20 ka tonelado lamang ang kapasidad niini. (BANAT NEWS)