Mga molupyo nangayo'g relocation site

CEBU, Philippines - Mikabat sa 40 ka mga molupyo sa sitio Anadol, barangay Lagtang, dakbayan sa Talisay ang nagpanon ngadto sa buhatan sa mayor sa milabay’ng semana aron mangayo og panabang nga mahatagan sila og lugar nga mabalhinan tungod kay papahawaon na sila sa lote nga ilang gipuy-an karon.

Ang bag-ong napiling kapitan sa barangay nga si Marc Ferdinand Bas mibutyag sa Banat News kagahapon nga ang nahisgutang lote adunay gilapdon nga kapin 2,000 metro kuwadrado ug gipuy-an kini   karon sa 68 ka mga balay sa eskuwater. Ang nahisgutang luna gipanag-iya kaniadto sa pamilyang Velez ug Abatayo apan niining bag-o lang napalit na sa DELCH Corp.

Unya buot unta kining koralon sa bag-ong   tag-iya apan wala madayon tungod kay mihangyo ang nahisgutang 40 ka nagpuyo nga mangayo una sila og tabang sa mayor alang sa ilang kabalhinan. Gibutyag ni Bas nga niadtong tuig 1995 may kapin 20 ka pamilya nga nagpuyo sa maong luna gibayran na sa pamilyang Abatayo ubos sa kasabotan nga mobiya sila sa maong lugar ug mamalhin sa laing lugar.

Apan giingong wala kini mobiya sa maong lote hangtod karon  nga naghatag na usab og labad sa bag-ong nakapalit sa maong luna.

Matud pa usab ni Bas nga motabang usab sila og hangyo sa DELCH nga hatagan una og lugway ang mga nanimuyo diha   samtang giplano pa ang ilang kabalhinan didto sa barangay Biasong. Apan gikataho nga kasagaran sa namuyo sa nahisgutang luna walay mga kasal, busa wala-silay ika-presentar nga marriage contract nga usa sa gikinahanglan sa siyudad aron kahatagan og lugar alang sa relocation site.

Kahinumdoman kaniadto nga adunay mga nagbagulbol nga mga kabus tungod kay wala sila makapahimulos sa mga housing project ug sa relocation site sa kagamhanan sa siyudad.

Apan nasuta nga ang maong mga nagbagulbol wala makahatag sa kompletong papeles sama sa marriage contract o certificate tungod kay puyo-puyo lang sila. (BANAT NEWS)