CEBU, Philippines - Ang mga kagawad sa Sangguniang Kabataan (SK) kinsa ubos sa landong sa Liberal Party (LP) sa dakbayan sa Talisay mihural kagahapon sa udto sa atubangan ni Konsehal Romeo Villarante kinsa usa usab ka abogado ug notaryo publiko.
Ang maong kalihokan gipahigayon sa balay ni Konsehal Danny Caballero nga kaalyado usab sa LP sa barangay San Isidro.
Ang mga mihural mao ang mga SK kagawad sa barangay Linao, Lawaan I, Lawaan III, Mohon, Biasong, Camp 4, Tapul ug Cansojong.
Sila si Konsehal Val Ylanan ug ang asawa niining bag-ong napiling kapitan sa Linao mitambong sa nahisgutang kalihokan.
Niadtong Nobiyembre 18, 2010 ang walo ka mga SK chairman sa LP gihapon uban sa mga kapitan mihural atubangan ni Bise Gobernador Gregorio Sanchez Jr. ug kang kanhi konsehal Hilario Davide III sa dakbayan sa Sugbo, kinsa maoy lider sa LP sa probinsiya.
Kagahapon sa hapon ang mga kapitan ug kagawad sa mga kabarangayan sa Talisay nga ubos sa partido sa administrasyon mihural usab atubangan ni Kongresista Eduardo Gullas sa unang distrito sa lalawigan sa Sugbo.
Ang maong kalihokan didto ipahigayon sa Peoples Hall sa city hall sa Talisay.
Bisan pa og nakahural na sa ilang mga katungdanan ang duha ka habig wala gihapon mobutyag sa ilang napiling padaganon nga presidente sa Association of Barangay Captain (ABC) ug presidente sa Sangguniang Kabataan Federation (SKF). (BANAT NEWS)