CEBU, Philippines - Namatay sulod sa New Bilibid Prison sa Muntinlupa ang kanhi presidente sa Association of Barangay Council sa siyudad sa Sugbo ug kaniadto kapitan sa barangay Guadalupe nga si Antolin Jariol Jr. sa pangidarong 59 anyos.
Si Jariol nabilanggo sulod sa dugay nang katuigan tungod sa kasong P86 milyones nga anomalya sa mga proyekto sulod sa pipila ka tuig ang milabay.
Si Jariol namatay sulod sa New Bilibid Prison Hospital sa Muntinlupa niadtong petsa 23 ning bulana Domingo sa alas-10 sa gabii tungod sa komplikasiyon sa sakit nga diabetes. Ang haya karun ni Jariol anaa gipahiluna sa Guadalupe Sports Complex sa barangay Guadalupe ug gikatakdang ilubong karung Lunes sa sementeryo sa lungsod sa Minglanilla.
Matud sa igsuon niini nga si Enrique Jariol Sr., nga kanhi usab mayor sa Sibulan taud-taod nang nag-antos sa sakit nga diabetes ang iyang igsuon ug gitakda na unta kining makagawas karung petsa 16 sa bulan sa Hunyo sunod tuig human mapupos ang iyang sentensya.
Si Guadalupe barangay Councilor Alex Semilla nga sakop sa Lupon nang Tagapamayapa kaniadto sa panahon ni Jariol dihang mao pa kini ang kapitan mihulagway nga tarung ang pagkatawo ug maayong modumala ang namatay nga kapitan niadtong dekada 80.
Si Jariol maoy unang nahimong ABC president gikan sa barangay Guadalupe niadtong 1982 ug napupos gyud ang termino niini pagka kapitan sa panahon pa ni kanhi Cebu City mayor Boy Cinco.
Si Jariol napasakaan og kaso ug nakombikto sa pasangil nga naglambigit sa P86 milyones nga anomalya sa mga proyektong imprastraktura tungod kay mao kini mibarug nga tag-iya ug mipirma sa Jariol Construction nga maoy gikontrata sa mga proyekto kaniadto sa Metro Cebu.
Ang nagbangutang pamilyang Jariol nangindahay karun nga mahatagan gihapon og rekognasyon sa kagamhanan sa siyudad sa Sugbo ang namatay nga kanhi ABC president sa dili pa kini itumod sa katapusang pahulayan. (BANAT NEWS)