CEBU, Philippines - Usa ka giingong kanhi sundalo ang gipusil samtang kini nagtan-aw og kalingawan sa usa ka peryahan niadtong miaging adlaw (Biyernes) pasado alas- 10 ang takna sa buntag didto sa sitio Guneco, barangay Guadalupe niining dakbayan. Ang biktima giila sa Guadalupe Police Station nga si Miguel Tallo, molupyo sa maong lugar kinsa naigo sa iyahang tiyan gidali pagdala sa iyahang mga silingan sa Cebu City Medical Center (CCMC).
Ang suspek giila usab nga si Arnel Tabasa, 34, nagpuyo sa J. Labra street Sitio Guneco kinsa daling miikyas ug dihang giadto sa mga polis pinangulohan ni Insp. Arvey Arbuis wala na kini didto sa ilang balay sanglit niadto pang Huwebes sa gabii kini wala muoli.
Apan nianang pagkahapon sa adlaw’ng Huwebes nakadawat og tawag sila si Arbuis nga ang gikatahapan nagpahibalong buot kining motahan hinungdan nga ilaha kining giadto ug nagtingkagol karon sa presinto 9.
Si Tallo gikatahong naigo diha sa tiyan gamit ang wala matinong kalire sa armas, ang kapolisan padayon pang nangita sa maong armas nga giingong gigamit ni Tabasa.
Si Tabasa dihang nahinabi sa Banat News diha sa iyang karsel mibutyag nga wala siya kahibalo kung unsa nga klase sa armas ang iyahang gigamit sa pagpusil sa biktima.
Wala usab kini mobutyag kun unsay hinungdan nganong iyahang gipusil si Tallo.
Si PO2 Milben Jimenez mibutyag nga dead on arrival ang biktima diha sa CCMC nga giingong nagrabehan sa samad pinusilan sa iyahang tiyan apan ang Banat News wala makakuha og kompirmasyon sa kamatayon ni Tallo gikan sa Homicide Section nga maoy nag-unang unit sa Cebu City Police Office nga moimbestigar sa mga susamang krimen.
Sa pagkakaron, gihulat pa sa kapulisan ang kabanay sa biktima nga mopasaka og kaso batok sa suspetsado. (BANAT NEWS)