Bag-ong mga kapitan nanumpa

CEBU, Philippines - Mga bag-ong napiling kapitan sa dakbayan sa Carcar ug Naga mihural kagahapon sa hapon ni Kongresista Eduardo Gullas.

Kagahapon sa ala 1:00 sa hapon ang 15 ka mga napiling kapitan sa Carcar ang mihural ug pagka-alas 4:00 sa hapon sa maong adlaw ang 28 ka mga napiling kapitan sa Naga mao na usab ang mihural.

Ang mayor sa Naga nga si Valdemar Chiong kagahapon mibutyag nga ang iyang igsuon nga si Virgilio Chiong sa barangay East Poblacion maoy kandidato sa ilang grupo isip presidente sa Association of Barangay Captain (ABC).

Si Virgilio naglaom nga walay mga problema unya sa iyang pagdagan sa nahisgutang posisyon lakip ang ilahang chairman sa Sangguniang Kabataan.

Sa laing bahin, karong adlawa (Sabado) ang mga kapitan nga ubos sa landong sa administrasyon sa siyudad sa Talisay gikatakdang mohural ngadto kang Gullas sa alas 6:00 sa gabii.

Gilauman karong adlawa ang 15 ka mga kapitan sa 22 ka barangay sa Talisay ang motambong sa nahisgutang kalihukan.

Sa milabay’ng semana ang pito ka kapitan nga kaalyado sa oposisyon mihural na ngadto kang Bise Gobernador Gregorio Sanchez ug kang Hilario Davide Jr., hepe sa Liberal Party sa probinsiya.  – BANAT NEWS