CEBU, Philippines - Nadakpan sa kapolisan ang gitumbok nga notadong tigpayuhot og ilegal nga drugas sa dakbayan sa Toledo atol sa gipahigayong buybust operation diha sa sitio Lawis sa barangay Luray-2 sa maong dakbayan niadtong Huwebes sa gabii.
Ang nadakpan giilang si Marion Bughaw Gempisaw, 34, molupyo sa maong lugar kinsa nakuhaan og usa ka paketeng may sulod nga gidudahang shabu balor nga P200 nga gipalit sa mga polis.
Sumala pang PO3 Thule Tajanlangit dihang gikahinabi sa Banat News nga ang ilaha mismong hepe nga si Sr. Insp. Rolly Lauron maoy nagsilbing poseur buyer atol sa maong operasyon.
Matud pa nga human makabayad ni Lauron gitunol dayon niini ang usa ka paketeng shabu hinungdan sa pagkasikop ni Gempisaw.
Nakuha gikan sa posesyon ni Gempisaw ang usa ka kahon nga adunay sulod nga upat ka dagkong paketeng may sulod nga gidudahang shabu. – BANAT NEWS