CEBU, Philippines - Giklaro ni Assistant Ombudsman for the Visayas Virginia Palanca Santiago nga may dakong tulubagon ang piskal sa siyudad sa Mandaue nga gipasanginlang nanagpa og mipapriso sa usa ka driver sa bus nga nakasaghid lamang sa sakyanan niini niadtong nakalabay nga semana.
Matud pa ni Santiago nga mahimong dako kaayo og matagamtamang silot ang nahisgutang piskal tungod kay gigamit man niini ang iyang posisyon aron pagpiit sa drayber nga si Rolando Lequin nga taga barangay Poblacion lungsod sa San Remegio, Cebu.
Sigon pa ni Santiago sa interbyu sa DyRF nga ang pagkapiskal ni Assistant Prosecutor Bienvenido Mabanto Jr. dili igong lisensiya sa pagpangdagmal ug pagpapriso sa mga yano ug kabus nga mga tawo. Nasayran nga si Lequin mipasaka og administrative complaint ngadto sa buhatan ni Regional State Prosecutor Fernando Gubalane samtang kasong kriminal usab ang gipasaka niini ngadto sa Ombudsman batok kang Mabanto.
Si Mabanto nga mihimakak sa pasangil ni Lequin ug mitumbok nga andam siyang moatubang sa maong mga sumbong nga gipasaka ni Lequin batok kaniya.
Samtang ang kapolisan sa dakbayan sa Mandaue nga maoy mipriso kang Lequin sulod sa kapin sa 72 ka oras mipadayag nga andam silang motubag sa sumbong kun iipatawag sila sa Ombudsman ug sa RSP tungod kay igo ra silang gisugo ni Mabanto.
Pipila ka mga miyembro sa Integrated Bar of the Philippines Cebu Chapter nagkanayon nga mahimong mapa-disbar si Mabanto sa iyang gibuhat. – BANAT NEWS