'Sabog' nanunggab napusilan sa polis

CEBU, Philippines - Usa ka lalaki nga giingong ‘sabog’ ang napusilan sa polis human nanunggab og trabahante sa city hall sa syudad sa Danao pasado alas-10 sa buntag kagahapon sa sitio Camalig Bato barangay Tabok.

Ang nadunggaban mao si Edgardo Paring Durano, 55, usa ka trabahante sa city hall sa syudad sa Danao diin nakaangkon kini og samad dinunggaban sa iyang walang bukton ug sa kilid nga bahin sa iyang lawas.

Samtang ang suspetsado nga napusilan nailhan usab nga si Ronald Matugas Caputolan, 21, ug molupyo sa maong lugar ug nakaangkon kini og samad pinusilan sa iyang wala nga paa.

Sa pakighinabi sa Banat News ni PO2 Marlon Remullo misaysay kini nga samtang ang biktima patubang na unta nga mosulod sa ilang panimalay kalit lang nga mipatim-aw ang suspetsado ug sa walay igong hinungdan midiretso kini og tusaktusak sa biktima.

Sa diha nga nahuman na ang suspetsado og dunggab kalmado kini kaayong milakaw palayo sa panimalay sa biktima. Ang biktima gidala sa Danao District Hospital.

Dihang giadto sa mga polis ang balay sa suspek si SPO3 Aresteo Espina nagpaila kini nga polis apan ang suspetsado mibungat pa kini nga “Unsa may gusto nimo ilis ta’g armas?” ug misuway na unta pagbunot ang suspetsado sa iyang kalibre .45 apan giunhan kini ni Espina pagpusil sa walang paa ug gidali usab og dala sa Danao District Hospital.

Nakuha sa posisyon sa suspetsado ang iyang armas ug ang kutsilyo nga gigamit sa pagdunggab sa biktima nga adunay gitas-on nga 10 pulgadas.

Matud pa ni Remullo nga base sa iyang obserbasyon sa suspetsado nagdudang sabog kini sa ginadiling drugas. – BANAT NEWS