CEBU, Philippines - Usa ka lalaking gituohang gi-salvage ang napalgan sa kasagbotan nga gitabunan og dahon sa saging kagahapon sa hapon diha sa barangay Pitalo sa lungsod sa San Fernando.
Ang patay’ng lawas sa biktima nga gibana-banang nagpangidaron og 20 ngadto sa 25-anyos nagsul-ob og itom nga short pants ug puti nga t-shirt ug ‘army-cut’ ang tupi niini.
Si Chief Insp. Carlos Reyes, hepe sa kapulisan sa naasoy’ng lungsod nga nahinabi sa Banat News pinaagi sa telepono mitug-an nga nakadawat sila og tawag sa telepono gikan sa usa ka concerned citizen ug nagpahibalong dunay napalgang patay’ng lawas sa tawo sa kasagbotan gibana-banang 20 metros ang gilay-on sa National Highway unahan sa simbahan Katoliko Romano sa Pitalo
Sa pasiunang pakisusi ni Reyes uban sa iyang mga sakop usa ka Ferdinand Palo kinsa padulong motubag sa tawag sa kinaiyahan maoy nakakita sa patay’ng lawas apan walay nakaila niini.
Matud pa ni Reyes nga misiwil ang tiil sa biktima gikan sa gitapok nga mga dahon sa saging hinungdan nga mikaratel og dagan si Palo ug nanawag sa awtoridad.
Ang biktima adunay dakong samad tinigbasan sa ulo ug gidudahan nga gilabay lang sa maong dapit human kini patya.
Nagtuo si Reyes nga niana pang gabii gipatay ang biktima unya gisakay og sakyanan dayon gilabay sa maong lugar sanglit gidugok na sa lagong ang lawas niini ug walay daghang dugo nga miawas gikan sa lawas.
Atol ning pagkutlo ning balita kagahapon sa hapon wala pay tagtungod nga miangkon sa maong patay’ng lawas. – BANAT NEWS