CEBU, Philippines - Nag-atubang og kasong reckless imprudence resulting to homicide ang usa ka drayber sa Ceres bus nga nakadasmag patay sa usa ka tawo nga kalit lang milabang sa dalan national sa barangay Jagobiao, dakbayan sa Mandaue niadtong Miyerkules sa hapon.
Si SPO2 Apolinarion Niez, imbestigador sa traffic division sa Mandaue City Police Office (MCPO) miila sa gipasakaan og kaso mao si Jaime Navarro, nga lumad nga taga Maya, Medillen.
Giila ni Niez ang biktima nga mao si Barcete Lawhari, lumad nga taga Marawi City ug kasamtangang nagpuyo sa Alaska Mambaling, dakbayan sa Sugbo.
Matud pa niya nga nakasinati og grabeng kadaut sa iyang kalawasan ang biktima kinsa dali nga gihatod sa mga motorista sa maong dapit ngadto sa Eversely Child Sanitarium Hospital sa maong dakbayan apan gideklarar kini sa mga doktor nga dead on arrival.
Si Niez miingon nga ang suspetsado nga giingong mi-hit and run sa pagdasmag sa biktima ang unang mitahan kang PO1 Nelson Sadili sa traffic section sa kapolisan sa maong dakbayan ug gitugyan usab kini kang SPO2 Francisco Balansag sa traffic division sa MCPO. – BANAT NEWS