CEBU, Philippines - Mokabat sa 20 ka mga balay nga ginama sa light materials ang naugdaw sa kalit nga pag-ulbo sa kalayo diha sa Perez Compound sa dalan Plaridel ug eskina P. Burgos sa barangay Alang-Alang, dakbayan sa Mandaue nga gialarma sa kabomberohan alas-12:40 kagahapon sa udto.
Si Mandaue City Fire Marshall, Rogelio Bongabong nga nahinabi sa Banat News miingon nga giisa ngadto sa second alarm ang alarma apan nakontrolar kini sa paglabay sa 15 minutos.
Matud pa niya nga mitabang sa ilang pagpawong sa kalayo ang kabomberohan sa dakbayan sa Sugbo, dakbayan sa Lapulapu, Filipino Chinese Fire Volunteer Brigade ug uban pa.
Usa sa gireklamo ni Bongabong mao ang kahagip-ot sa agianan sa pagsulod sa maong lugar nga nakapalangay sa ilang operasyon.
Si SFO2 Roy Garcia, imbestigador sa kabomberohan sa maong dakbayan miingon nga sa iyang pasiunang pakisusi maoy iyang nasayran nga ang kalayo nagsugod sa panimalay ni Marlyn Quino tungod sa giingong pagdaob niini sa kilid sa ilang balay.
Apan dihang nahinabi si Quino gipanghimakak kini niini ug bisan siya nahingangha sa kalit nga pagsilaob sa kalayo sa kilid sa bungbong sa iyang panimalay, nagduda siya nga gikan sa nasablay nga linya sa mga kuryente ang sinugdanan niini.
Si Manuel Tuñacao gikan pa sa merkado publiko miingon nga wala gyud silay napunit sa ilang mga butang sanglit naugdaw na man kini sa iyang paghidangat sa maong dapit.
Si SFO2 Garcia miingon nga padayon pa ang gihimo nilang imbestigasyon. – BANAT NEWS